जेष्ठ ५, २०८१ शनिबार Sat May 18 2024

कृषि क्षेत्रका अनुसन्धान स्थानीय तहमा पु-याउनुपर्छ : अध्यक्ष डा तिमल्सिना



पाटन । राष्ट्रिय समावेशी आयोगका अध्यक्ष डा रामकृष्ण तिमल्सिनाले कृषि क्षेत्रमा भएका अनुसन्धानलाई स्थानीय तहमा पुर्‍याउन आग्रह गरेका छन् ।

आत्मनिर्भर अर्थतन्त्र निर्माणका विषयमा राष्ट्रिय समावेशी आयोग र राष्ट्रिय कृषि अनुसन्धान परिषद (नार्क)बीच भएको अन्तरक्रियामा आयोगका अध्यक्ष डा तिमल्सिनाले कृषि क्षेत्रमा भइरहेका नीति नियमलाई कसरी प्रभावकारी रुपमा कार्यान्वयन गर्ने भन्ने कुरामा ध्यान दिन आग्रह गरेका हुन् ।उनले राष्ट्रिय कृषि अनुसन्धान परिषदलाई न्यून लगानीका आयोजना, दीर्घकालीन परियोजना तय गर्न आग्रह गरे । कृषि विषयलाई पाठ्यक्रममा राख्ने क्रममा शिक्षा, विज्ञान तथा प्रविधि मन्त्रालय र पाठ्यक्रम विकास केन्द्रसँग समन्वय गर्न आग्रह गरे ।राष्ट्रिय समावेशी आयोगकी सदस्य बिष्णुमाया ओझाले देशलाई निर्वाहमुखी कृषिलाई व्यवसायमुखी बनाउँदै जानुपर्नेमा जोड दिइन् । “कृषि क्षेत्रलाई उद्योगका रुपमा स्थापित गर्न स्थानीय सरकारसँग समन्वय र सहकार्य गर्नुपर्छ । नीति निर्माणका लागि राष्ट्रिय तहमा समन्वय गरेर पहल गर्नुपर्ने छ । निर्यातको सम्भावना भएका कफी, चियालगायतका उपजलाई प्राथमिकता दिनु आवश्यक छ”, उनले भनिन् ।राष्ट्रिय कृषि अनुसन्धान परिषद कायम मुकायम कार्यकारी निर्देशक डा ध्रुवराज भट्टराईले अहिले देशमा ७२ लाख मेट्रिक टन धान आवश्यक भएकोमा ५६ लाख मेट्रिक टन मात्रै उत्पादन भएकाले करिब १७ लाख टन आयात गर्नुपरेको वताए ।उनले चैते धान उत्पादनमा जोड दिने गरी बजेट बिनियोजन गर्न सुझाव दिए । कृषि क्षेत्रको विकास गर्न पालिकालाई सूचना, प्रविधि र नवप्रवर्तनसँग जोड्न आवश्यक रहेको उनको भनाइ छ । भट्टराईले हाल नार्कले उत्पादन गरेको ४० जातका धान प्रचलनमा रहेको भन्दै उद्यमी किसान र बेरोजगार युवालाई आवासीय तालिमको व्यवस्था गरिरहेको बताए । 

प्रकाशित मिति : ११ आश्विन २०८०, बिहिबार  १२ : ०२ बजे