रौतहट । रौतहटको कटहरिया नगरपालिका वडा अध्यक्षले कर्मचारीलाई कार्यकक्षमै कुटपिट गरेका छन् । कटहरिया वडा नम्बर ९ का वडाअध्यक्ष रुपेश कुमार यादवले जिन्सी फाँटका कर्मचारी सन्तोष जैसवाललाई कुटपिट गरेका हुन् । वडा अध्यक्ष
यादवले कार्यालय समयभित्रै जिन्सी फाँट पसेर जैसवाललाई एक्कासी हातपात गरेका हुन् । वडा अध्यक्ष यादवले दिउँसो केही मानिस लिएर जिन्सी फाँटमा पसी गालीलौज गर्दै आफूलाई कुर्सीबाट पछारेर हातपात गरेको पीडित जैसवाल बताउँछन् ।
कटहरिया नगरपालिकाले केहीदिन अघि मगाएको दुई वटा सोलारबत्ती मेयर जयप्रकाश जैसवालको निर्देशनमा जमुनिया विद्यालय र डुमरिया विद्यालयमा जडान गरिएको थियो ।
सोही सोलार जडानबारे वडा अध्यक्ष रुपेश कुमार यादवले फोनबाट सोधेपछि मेयरको आदेशमा दुवै सोलार बत्ती जडान भइसकेको जानकारी आफूले गराएको उनले बताए ।
फोनमा कुरा गरेको एकघण्टा भित्रै कार्यालयमा आएर ‘मेरो वडा कार्यालयमा सोलार बत्ती किन जडान गरिनस्’ भन्दै आफूमाथि हातपात तथा दुर्व्यवहार गरेको जैसवालको भनाइ छ ।
उनले आफूमाथि भएको कुटपिट तथा दुर्व्यवहारका बारेमा आवश्यक कारवाहीका लागि ईलाका प्रहरी कार्यालय गरुडामा उजुरी दिएको पनि बताए ।