काठमाडौं । टर्की र सिरियामा सोमबारको ७.८ म्याग्निच्युडको शक्तिशाली भूकम्पमा परी अहिलेसम्म ७ हजार ९२६ जनाको मृत्यु भएको छ ।
भूकम्पबाट अहिलेसम्म टर्कीमा ५ हजार ८९४ र सिरियामा २०३२ जना गरि कुल ७ हजार ९२६ जनाको मृत्यु भएको छ ।
टर्कीको डिजास्टर एण्ड इमर्जेन्सी म्यानेजमेन्ट एजेन्सीका अनुसार अहिलेसम्म भूकम्पबाट टर्कीमा अहिलेसम्म घाइते हुनेको संख्या ३४ हजार नाघेको छ भने सिरियामा ४ हजार भन्दाबढी घाइते भएका छन् ।
सिरियामा सरकार नियन्त्रित क्षेत्रहरु अलेप्पो, हामा, लाटाकिया र टार्टसका क्षेत्रहरूमा ठुलो नोक्सान भएको मिडिया रिपोर्टमा बताइएको छ ।
टर्कीको दक्षिणपूर्वी क्षेत्रमा पर्ने गाजियान्टेप नजिकै स्थानीय समयअनुसार सोमबार बिहान ४ः १७ बजे ७.८ म्याग्निच्युडको भूकम्प गएको अमेरिकी भौगर्भिक सर्भेले जनाएको छ । त्यसपछि सोमबार पटक पटक पराकम्प आइरहेको र अपराहन्न करिब ४ बजे ७.५ रेक्टर स्केलको दोस्रो शक्तिशाली भूकम्प आएको थियो ।
पहिलो भूकम्प आएपछि अहिलेसम्म ४ रेक्टर स्केलभन्दा बढीका १०० भन्दा बढी पराकम्पहरु आएको अमेरिकी भौगर्भिक सर्भेले जनाएको छ ।
भूकम्पको धक्का टर्की र सिरियाका अलावा लेबनान र साइप्रसमा पनि महशुस गरिएको थियो ।