काठमाडौं । सिन्धुपाल्चोकको चौतारा साँगाचोकगढी नगरपालिकाका पूर्वमेयर अमानसिंह तामाङ नेकपा एमालेमा प्रवेश गर्ने लागेका छन् । तामाङ २०७४ सालको स्थानीय निर्वाचनमा माओवादी केन्द्रबाट मेयरमा निर्वाचित भएका थिए ।
पार्टीले जिम्मेवारी बाँडफाँटमा आफ्नो मुल्यांकन नगरेको, परिवारवाद हावी भएको लगायतका कारण देखाउँदै तामाङ एमाले प्रवेश गर्न लागेका हुन्।
माओवादीमा देखिएको व्यक्तिवाद र स्वार्थका कारण आफू एमाले प्रवेश गर्न लागेको तामाङले बताएका छन् । उनले आफूलाई पार्टीले जिम्मेवारी बाँडफाँट गर्ने विषयमा पक्षपात गरेको आरोप लगाएका छन् । । ‘सार्वजनिक पदमा आलोपालो हुनु स्वभाविक हो,’ तामाङ भन्छन्, ‘पार्टीले सांगठनिक जिम्मेवारी दिनुपर्छ भन्ने मेरो भनाई हो ।’
सिन्धुपाल्चोक क्षेत्र नम्बर २ का प्रतिनिधिसभा सांसद तथा पूर्वमन्त्री शेरबहादुर तामाङका अनुसार भोलि (६ भदौ) दिउँसो १ बजे पार्टी केन्द्रीय कार्यालय च्यासलमा आयोजित पार्टी प्रवेश कार्यक्रममार्फत उनलाई एमाले प्रवेश गराउने कार्यक्रम रहेको छ ।
एमाले अध्यक्ष केपी शर्मा ओलीको उपस्थितिमा आयोजना हुने उक्त कार्यक्रममार्फत तामाङलाई पार्टी प्रवेश गराउन लागिएको उनले बताएका छन् ।