काठमाडौं । काठमाडौं महानगरपालिकाको शैक्षिक मामिला सल्लाहकार रेशु अर्यालले पदबाट राजीनामा दिएकी छिन् । अर्यालले काठमाडौंका मेयर बालेन्द्र साहको गतिविधिप्रति असहमति जनाउँदै आफूले पदबाट राजीनामा दिएको विज्ञप्तिमा भनिएको छ ।
त्यस्तै, मेयर बालेनका पछिल्ला एक्सन, निर्णय प्रक्रियालगायतका विषयमा आफ्नो असहमति रहेको उनले उल्लेख गरेकी छन् । एक वर्षअद्धि अर्याललाई बालेनले मेयर भएलगत्तै सल्लाहकार नियुक्त गरेका थिए ।
अर्याल टिच फर नेपालको संस्थापकसमेत हुन् । उनी यसअघि विवेकशील साझा पार्टीको केन्द्रीय सदस्यसमेत थिइन्। सामाजिक अभियन्तासमेत रहेकी अर्याल टिच फर नेपालको संस्थापक बोर्ड सदस्य र पाँच वर्ष अध्यक्ष भइरहेकी छिन् ।
उनले कोलम्बिया विश्वविद्यालयको टिचर्स कलेजबाट शैक्षिक सुधारको लागि नेतृत्व विषयमा स्नातकोत्तर गरेकी छिन् ।
महानगरका अनुसार सन् २०१७ मा शिक्षा क्षेत्रमा योगदान गरेबापत सिंगापुरको नेसनल इन्स्टिच्युट अफ एजुकेसनले अर्याललाई प्रतिष्ठित पुरस्कारबाट पुरस्कृत पनि गरेको थियो। उनी हवेली आउटडोर लर्निङ सेन्टरका संस्थापक निर्देशक पनि हुन्।
