काठमाडौं । कोशी प्रदेशका मुख्यमन्त्री उद्धव थापाले आज विश्वासको मत लिने सम्भावना कम देखिएको छ ।
विश्वासको मत लिने प्रयोजनका लागि प्रदेशसभा बैठक बोलाइए पनि सभा सञ्चालन गर्ने उपसभामुख नै अचानक बिरामी भएको पत्र थमाएर काठमाडौं लागेपछि थापाले आज विश्वासको मत लिने सम्भावना कम देखिएको हो ।
सभामुखले राजीनामा दिएको अवस्थामा उपसभामुखले सभा सञ्चालन गर्ने व्यवस्था छ । तर, उपसभामुख सृजना दनुवार आज आफैले १ बजेका लागि बोलाएको बैठक छाडेर काठमाडौं उडेपछि सत्ता गठबन्धन संकटमा परेको छ ।
विराटनगरपस्थत एक होटलमा सर्वदलीय बैठकपछि संचारकर्मीसँग कुरा गर्दै मुख्यमन्त्री थापाले आजै विश्वासको मत लिने सम्भावना टरेको बताए ।
उनले भने, ‘आफैंले बोलाएको बैठकमा उपसभामुख नै अनुपस्थित हुनुभयो । आजै विश्वासको मत लिने सम्भावना देखिएन । सल्लाह गरेर अर्को दिनलाई निश्चित गरेर हामी अगाडि बढ्छौं ।’
यद्यपि कार्यव्यवस्था परामर्श समितिको बैठक राखेर त्यसबारे औपचारिक निर्णय गर्ने उनले बताए । ‘कार्यव्यवस्था परामर्श समितिको बैठक बसेर के गर्ने भन्ने निर्णय हुन्छ,’ उनले भने ।