वीरगञ्ज । वीरगञ्ज महानगरपालिकाले आईसीसी क्रिकेट विश्वकप लिग टू मा नेपालको तर्फबाट उत्कृष्ट प्रदर्शन गरेका दुई खेलाडीलाई सम्मान गरेको छ । नेपाल विश्वकप क्वालिफायरमा छनौट भएपछि राष्ट्रिय क्रिकेट टिमका खेलाडीद्वय आरिफ शेख र आसिफ शेखलाई महानगरले सम्मान गरेको हो । उनीहरु दाजुभाइ हुन् ।
उनीहरुलाई मेयर राजेशमान सिंहले दोसल्ला ओढाएर स्वागत तथा सम्मान गरेका थिए । त्यसैगरी आरिफ र आसिफका बुबा शेख सलाम र स्थानीय प्रशिक्षक जाहुर अन्सारी पनि सम्मानित भएका थिए ।
मेयर सिंहले नेपाललाई विश्वकप क्वालिफायरमा पु¥याउन विशेष भूमिका निर्वाह गरेको भन्दै उनीहरुको प्रशंसा गरेका थिए । त्यसैले उनीहरुलाई यही चैत १७ गते नागरिक अभिनन्दन गर्ने घोषणा गरेका छन् । सोही दिन महानगरले यसअघि घोषणा गरेको पुरस्कार स्वरुप मोटरसाइकल पनि प्रदान गर्ने महानगरले जनाएको छ ।