काठमाडौं । मधेसी आयोगले १४९ जात र मुस्लिम–थारुलाई मधेसीका रूपमा परिभाषित गर्न आफ्नो वार्षिक प्रतिवेदनमार्फत राष्ट्रपति विद्यादेवी भण्डारी समक्ष सिफारिस गरेको छ ।
राष्ट्रपतिको कार्यालयमा पेस गरिएको आयोगको चौथो वार्षिक प्रतिवेदनमा १४९ जात र दुई हजार २०० भन्दा बढी थरहरूलाई मधेसीका रूपमा पारिभाषित गर्न सिफारिस गरिएको छ ।
आयोगले आफ्नो प्रतिवेदनमार्फत चुरे संरक्षण गरी पानीको स्रोत जोगाउनुपर्ने, स्थानीय पाठ्यक्रममा स्थानीय भाषाको प्रयोग हुनुपर्ने, मधेसी समुदायको आस्थाको केन्द्र रहेको हिन्दु संस्कृतिमाथि हुने अतिक्रमण रोक्नुपर्ने, हुलाकी राजमार्गको पूर्णता, मधेस प्रदेशका आठ जिल्लालाई सुक्खा क्षेत्र घोषणा गरी किसानलाई राहत दिनुपर्नेलगायत सिफारिसहरू गरेको छ ।
यस्तै, जनकपुरको जानकी मन्दिर, सप्तरीको बलान बिहुल गाउँपालिकामा रहेको लक्ष्मीनारायण मन्दिरलाई विश्वसम्पदा सूचीमा सूचीकृत गर्न आयोगले सिफारिस गरेको छ ।
आयोगले सप्तरीको सखादेश्वरी भगवती मन्दिरको संरक्षण तथा सम्वद्र्धन, नेपाल–भारत सीमामा देखापरेको विभिन्न आर्थिक तथा सामाजिक समस्याहरूको यथाशीघ्र निवारण, मिथिला पेन्टिङको अन्तर्राष्ट्रियकरण, नवलपरासीको त्रिवेणीधाम, कपिलवस्तुको तिलौराकोटलाई पर्यटन गन्तव्यका रूपमा विकास गर्नलगायत विषयहरूमा आयोगले सिफारिस गरेको जनाइएको छ ।