काठमाडौं। युवा कवि हेमन्त शिशिरले पहिलो कवितासंग्रह ‘बन्द कोठाको झ्याल’ सार्वजनिक गरेका छन्।सांग्रिला बुक्सद्वारा प्रकाशित उक्त कृतिको लोकार्पण एक भव्य समारोहबीच नेपाल पर्यटन बोर्डको सभाहलमा सम्पन्न भयो।
यस कवितासंग्रहले साहित्यिक वृत्तमा व्यापक चर्चा बटुल्नुका साथै ‘विश्वज्योति पाण्डुलिपि पुरस्कार’ प्राप्त गरी आफ्नो काव्यिक मूल्य र गहिराइ प्रमाणित गरिसकेको छ। यो पुरस्कार ४० वर्षमुनिका र अघिसम्म कुनै कृति प्रकाशन नगरेका नयाँ कविहरूलाई प्रोत्साहन दिने उद्देश्यले स्थापना गरिएको हो।
लोकार्पण समारोहमा ललितकला प्रज्ञा प्रतिष्ठानका कुलपति नारदमणि हार्तम्छाली, प्राध्यापक डा. रजनी ढकाल, कवि राजेन्द्र सलभ, विश्वविमोहन श्रेष्ठ र उषा शेरचनले संयुक्त रूपमा संग्रह सार्वजनिक गरेका थिए।
कार्यक्रममा बोल्दै कुलपति हार्तम्छालीले शिशिरका कविताले नयाँ पुस्ताको संवेदनशीलता र चेतनालाई साहित्यिक रूपमा उजागर गरेको बताउँदै ‘बन्द कोठाको झ्याल’ केवल कवितासंग्रह नभई समयको आवाज भएको धारणा राखे।
त्यस्तै, डा. ढकालले शिशिरका कवितामा भाषिक सुगठन र भावनात्मक गहिराइ सँगसँगै देखिएको उल्लेख गर्दै कृति युवा सर्जकहरूका लागि प्रेरणाको स्रोत बन्ने विश्वास व्यक्त गरिन्। कवि उषा शेरचनले भने शिशिरको कवितामा जीवनको सूक्ष्म अनुभूति र सामाजिक यथार्थबीचको सन्तुलित संयोजन पाइने धारणा राखिन्।
अछामको ढकारी गाउँपालिका–८ मा जन्मिएका कवि शिशिर विगत डेढ दशकदेखि नेपाली कविता लेखनमा सक्रिय छन्। सुदूरपश्चिमको ग्रामीण जीवन र वैश्विक चेतनाको समायोजन उनका कविताको मूल विशेषता मानिन्छ।
उनले लोकार्पण समारोहमा बोल्दै ‘बन्द कोठाको झ्याल’ आफ्नो मनको झ्याल भएको र यही झ्यालबाट संसारलाई हेरेको अनुभव कवितामा पोखिएको उल्लेख गरे। कविताहरू बन्द कोठामा लेखिए पनि खुला आकाश र सम्भावनाको उज्यालो खोजिरहेको उनले बताए।
शिशिरका कवितामा प्रेम, पीडा, आशा र विद्रोहका स्वरहरू जीवन्त रूपमा गुन्जिएका छन्। सामाजिक असमानता, मानवीय सम्बन्धको जटिलता र आत्मचिन्तनलाई समेट्दै कविताले पाठकलाई सोच्न र महसुस गर्न बाध्य बनाउँछ।
सांग्रिला बुक्सद्वारा प्रकाशित यस कवितासंग्रहको मूल्य ३०० रुपैयाँ तोकिएको छ। प्रकाशकका अनुसार कृतिको पहिलो संस्करणले नै पाठकहरूको मन जित्ने विश्वास लिएको छ।
‘विश्वज्योति पाण्डुलिपि पुरस्कार’बाट सम्मानित यो संग्रहले नेपाली साहित्यमा युवा कविहरूको सम्भावना उजागर गरेको छ। कवि शिशिरको काव्ययात्रा सुदूरपश्चिमको माटोबाट सुरु भई काठमाडौंको साहित्यिक मञ्च हुँदै विश्व साहित्यसम्म पुग्ने अपेक्षा गरिएको छ।
लोकार्पण समारोहमा साहित्यकार विश्वविमोहन श्रेष्ठले शिशिरका कविताले आफ्नै कथा नयाँ ढंगले सुनाएको धारणा राखे। कवि राजेन्द्र सलभले भने ‘बन्द कोठाको झ्याल’ समयको दस्तावेज भएको र यसले पाठकलाई आत्मचिन्तनको यात्रामा लैजाने बताए।