बझाङ।बझाङको केदारस्युँ गाउँपालिकाको धारछडामा भएको जीप दुर्घटनामा घाइते भएका धर्मराज जोशी र प्रहरी सहायक हबल्दार दीपक भण्डारी खतरामुक्त रहेका छन् ।
बाँकेस्थित कोहोलपुर मेडिकल कलेजका अर्थोपेडिक रेसिडेन्ट डा। ब्राईन पोख्रेलले घाइते दुवै जनालाई सघन उपचार कक्षमा राखिएको र होसमा भएको जानकारी दिए । जोशी र भण्डारी दुवैजना बोल्न सक्ने अवस्थामा रहेको उनको भनाइ छ ।
उपचारका क्रममा एमआरआई र सिटिस्क्यान गरी जाँच गर्दा दुवैजनाको मेरुदण्डमा समस्या देखिएको डा। पोख्रेलले जानकारी दिए ।
जोशीको मेरुदण्डको दुई ठाउँमा भाँचिएको छ भने भण्डारीको घाँटीको पछाडिको भागमा रहेको एक ठाउँको हड्डी दबिएको छ ।
दुवै जनाको चाँडो शल्यक्रिया गर्नुपर्ने भए पनि परिवारका कुनैपनि सदस्य अस्पतालमा नआइपुगेकाले शल्यक्रिया हुन नसकेको उनको भनाइ छ ।
जोशी सुदूरपश्चिम प्रदेशका आन्तरिक मामिला तथा कानुनमन्त्री पृथ्वीबहादुर सिंहको जीप चालक र भण्डारी अङ्गरक्षक हुन् ।
उक्त दुर्घटनामा परेका मन्त्री सिंहको सोही मेडिकल कलेजमा उपचारका क्रममा हिजो निधन भएको थियो । दुर्घटनामा मन्त्री पत्नी अमृता र भाउजू जयादेवीको पनि मृत्यु भएको थियो ।